Orðabækur og tímans tönn

13.6.2012 19:40:00
Orðabækur og tímans tönn

Málþing um orðabækur í safnaðarheimili Neskirkju

Tímaritið Orð og tunga hefur verið gefið út á Orðabók Háskólans um árabil en með sameiningu stofnana á síðasta ári færðist útgáfan í hendur Stofnunar Árna Magnússonar í íslenskum fræðum. Fyrir nokkrum árum var tekinn upp sá háttur að efna til málþings um tiltekið efni á sviði orðfræði eða orðabókafræði með það í huga að fyrirlesarar á málþinginu myndu síðan gera umræðuefni sínu nánari skil í fræðilegri grein í tímaritinu. Hvert hefti Orðs og tungu hefur þannig að geyma samstæðan þemahluta.

Yfirskrift málþingsins er að þessu sinni Orðabækur og tímans tönn. Hér er m.a. hugsað til þess hvað það er helst í orðabókum sem illa stenst tímans tönn, hversu hratt orðabækur úreldast og hvernig best verður staðið að endurskoðun þeirra eða endurnýjun. Viðfangsefnið tengist bæði innihaldi orðabóka og gerð þeirra. Breytingar á máli og málnotkun geta kallað á nýja orðalýsingu en jafnframt geta ný sjónarmið og nýjar forsendur í orðabókafræðum og orðabókagerð stuðlað að því að eldri verk úreldist eða verði gamaldags. Fyrirlesarar á málþinginu koma að efninu úr ólíkum áttum. Þar gefst gott tilefni til umræðjna og skoðanaskipta og eru gestir á málþinginu hvattir til að taka virkan þátt í þeim.

Málþingið hefst í dag, föstudag, kl. 13:00 og fer fram í safnaðarheimili Neskirkju.

Til baka