|
23.7.2014 12:06:00
Fimm bækur tilnefndar til Ísnálarinnar – Iceland Noir verðlaunanna fyrir bestu þýddu glæpasöguna Reykjavík, 23. júlí 2014 Fréttatilkynning frá Bandalagi þýðenda og túlka, Hinu íslenska glæpafélagi og Iceland Noir Höfundar og þýðendur eftirtalinna fimm bóka hljóta tilnefningu til Ísnálarinnar – Iceland Noir verðlaunanna 2014, fyrir bestu þýddu glæpasöguna:
Alþjóðlega glæpasagnahátíðin Iceland Noir, Bandalag þýðenda og túlka og Hið íslenska glæpafélag standa að verðlaununum sem veitt verða í fyrsta sinn á Iceland Noir glæpasagnahátíðinni í Norræna húsinu, þann 22. nóvember næstkomandi. Í dómnefnd sitja Katrín Jakobsdóttir, alþingismaður og fyrrverandi menntamálaráðherra, Kolbrún Bergþórsdóttir blaðamaður og bókmenntagagnrýnandi, Magnea J. Matthíasdóttir, formaður Bandalags þýðenda og túlka, Quentin Bates rithöfundur og þýðandi og Ragnar Jónasson rithöfundur. Umsögn dómnefndar um hinar tilnefndu bækur: Að gæta bróður míns (Veljeni vartija; Antti Tuomainen / Sigurður Karlsson): Frábærlega skrifuð rökkursaga frá Finnlandi. Sterkur og snarpur stíll höfundar er áhrifamikill og grípandi og kemst vel til skila í íslenskri þýðingu. Brynhjarta (Panserhjerte; Jo Nesbø / Bjarni Gunnarsson): Stórgóður krimmi, í vandaðri þýðingu, frá norska stórmeistaranum; áttunda bókin um Harry Hole og ein sú besta í syrpunni. Hún er horfin (Gone Girl; Gillian Flynn / Bjarni Jónsson): Lipurlega þýdd úrvalsspennusaga; framvindan óhefðbundin og óvænt, sagan hörkuspennandi og hröð, og fléttan eitursnjöll. Manneskja án hunds (Människa utan hund; Håkan Nesser / Ævar Örn Jósepsson): Fyrsta flokks fjölskyldusaga í formi glæpasögu, drifin áfram af áhugaverðum persónum, í úrvalsþýðingu sem hæfir frásögninni vel. Sannleikurinn um mál Harrys Quebert (La Vérité sur l'affaire Harry Quebert; Joël Dicker / Friðrik Rafnsson): Óvenjuleg söguhetja flækist í morðgátu sem kemur stöðugt á óvart og heldur athygli í sjöhundruð blaðsíður; skemmtilega uppbyggð bók í vandaðri þýðingu. Alþjóðlega glæpasagnahátíðin Iceland Noir (www.icelandnoir.com/) verður haldin í annað sinn helgina 20. – 23. nóvember næstkomandi. Á þriðja tug innlendra sem erlendra rithöfunda tekur þátt í hátíðinni, sem er opin öllum áhugamönnum um glæpasögur. Skráning fer fram á vefnum icelandnoir.com, hjá Hinu íslenska glæpafélagi og Borgarbókasafninu. Tilnefningar til Ísnálarinnar eru tilkynntar á fæðingardegi glæpasagnahöfundarins Raymonds Chandlers (f. 23. júlí 1888), en hann nýtti sér ísnál sem morðvopn í bók sinni The Little Sister (1949). Bókin kom út á íslensku árið 1990, í þýðingu Þorbergs Þórssonar, og hét þá Litla systir. Til baka |
Bandalag þýðenda og túlka | Hrísmóum 11 | 210 Garðabær | thot@thot.is